റേഷന്‍ മണ്ണെണ്ണ നിറുത്താന്‍ കേന്ദ്രം

റേഷന്‍ മണ്ണെണ്ണ നിറുത്താന്‍ കേന്ദ്രം

വര്‍ഷത്തോടെ റേഷന്‍ മണ്ണെണ്ണ വിതരണം പൂര്‍ണമായി നിറുത്താന്‍ കേന്ദ്ര സര്‍ക്കാര്‍ ആലോചിക്കുന്നു.

കഴിഞ്ഞ സാമ്ബത്തിക വര്‍ഷം 3888 കിലോ ലിറ്റര്‍ (38.88 ലക്ഷം ലിറ്റര്‍) മണ്ണെണ്ണ അനുവദിച്ചത് ഇത്തവണ പകുതി വെട്ടിക്കുറച്ച്‌ 1944 കിലോ ലിറ്റര്‍ (19.44 ലക്ഷം ലിറ്റര്‍) ആക്കി.

കേന്ദ്ര പെട്രോളിയം മന്ത്രാലയം കേരളം ഉള്‍പ്പെടെയുള്ള സംസ്ഥാനങ്ങളുടെ പൊതുവിതരണ വകുപ്പുകളെ ഇക്കാര്യം അറിയിച്ചിട്ടുണ്ട്. മണ്ണെണ്ണ ഉപയോഗം കുറയ്‌ക്കുന്ന കേന്ദ്ര നയത്തിന്റെ ഭാഗമായി ഏതാനും വര്‍ഷങ്ങളായി വിഹിതം കുറയ്ക്കുകയാണ്. ഇതോടൊപ്പം മത്സ്യത്തൊഴിലാളികളുടെ മണ്ണെണ്ണയും കുറയ്ക്കുന്നത് മത്സ്യബന്ധനമേഖലയ്ക്ക് തിരിച്ചടിയാകും.

വിഹിതം കുറയ്ക്കുന്നതിനൊപ്പം വില കൂട്ടുന്നുമുണ്ട്. കഴിഞ്ഞ സാമ്ബത്തിക വര്‍ഷം വിഹിതം 40ശതമാനം കുറച്ചപ്പോള്‍ ലിറ്ററിന് 28 രൂപ കൂട്ടി 81 രൂപയാക്കിയിരുന്നു. കേന്ദ്രം കുറയ്ക്കുന്നതനുസരിച്ച്‌ സംസ്ഥാന സര്‍ക്കാരും റേഷന്‍ വിഹിതം കുറയ്‌ക്കുകയാണ്. 2021 ഏപ്രില്‍ മുതല്‍ മഞ്ഞ, പിങ്ക്, കാര്‍ഡുകള്‍ക്ക് ഒരു ലിറ്ററും നീല, വെളള കാര്‍ഡുകള്‍ക്ക് അര ലിറ്ററും വൈദ്യുതീകരിക്കാത്ത വീടുള്ളവര്‍ക്ക് എട്ടു ലിറ്ററും മാത്രമായി ചുരുക്കി. വിതരണം മൂന്നു മാസത്തിലൊരിക്കലാക്കി. കഴിഞ്ഞ ഏപ്രില്‍ മുതല്‍ മൂന്നു മാസത്തിലൊരിക്കല്‍ വൈദ്യുതീകരിക്കാത്ത വീടുള്ളവര്‍ക്ക് ആറു ലിറ്ററും മറ്റെല്ലാ കാര്‍ഡുകള്‍ക്കും അര ലിറ്ററുമായി ചുരുക്കി. ഈ മാസം മുതല്‍ നീല, വെള്ള കാര്‍ഡുകളുടെ മണ്ണെണ്ണ പൂര്‍ണമായും നിറുത്തലാക്കി.

വിഹിതം താഴോട്ട് (കിലോലിറ്റര്‍)

2019-20------12,043

2020-21-------- 9264

2021-22---------6840

2022-23---------3888

2023-24---------1944

വില മേലോട്ട്

2020 മേയ്.................... 19 രൂപ

2020 നവംബര്‍............ 25

2021 ഫെബ്രുവരി....... 47

2021 നവംബര്‍.............53

2022 ഏപ്രില്‍.............. 81

ബദല്‍ ഇല്ലാതെ മത്സ്യമേഖല

മത്സ്യമേഖലയുടെ നോണ്‍ പി.ഡി.എസ് വിഹിതം 2160 കിലോ ലിറ്ററില്‍ (21.60 ലക്ഷം ലിറ്റര്‍) നിന്ന് 1296 കിലോ ലിറ്ററാക്കി (12.96 ലക്ഷം ലിറ്റര്‍) ചുരുക്കിയതോടെ ഭൂരിഭാഗം മത്സ്യത്തൊഴിലാളികളും പുറത്തു നിന്ന് മണ്ണെണ്ണ വാങ്ങേണ്ടി വരും. റേഷന്‍ മണ്ണെണ്ണയ്ക്ക് 25 രൂപ സബ്സിഡി ലഭിച്ചിരുന്നു. പൊതുവിപണിയില്‍ വില 102 രൂപയാണ്.

14,000ത്തിലേറെ ഔട്ട് ബോര്‍ഡ് എന്‍ജിനുകള്‍ക്ക് പെര്‍മിറ്റ് പ്രകാരം കഴിഞ്ഞ വര്‍ഷം മൂന്നു മാസമാണ് മണ്ണെണ്ണ നല്‍കിയത്. മുഴുവന്‍ വിഹിതം നല്‍കിയതുമില്ല. വെട്ടിക്കുറയ്ക്കല്‍ കേന്ദ്രം നേരത്തെ ആരംഭിച്ചെങ്കിലും മത്സ്യമേഖലയ്ക്ക് ബദല്‍ പദ്ധതികളൊന്നും ഇല്ല.